Postuar më: 19 Shtator 2017

"Edukimi përmes Kulturës" nis nga Lezha. Kumbaro: “Të ushqejmë mendjen me librin”

“Kampionët e leximit”, nxënësit nga fshati Blinisht dhe qyteti i Lezhës mirëpritën sot në ambientet e Bibliotekës  Publike, Ministren  e Kulturës,  znj. Mirela Kumbaro , ku nisi programi i  Ministrisë së Kulturës për pasurimin e bibliotekave publike dhe shkollore.  “Kampionët”, që  kanë lexuar 25 libra për një muaj janë fëmijë të moshës 6-14 vjeç të zonave të largta rurale të Lezhës.

Ministrja Kumbaro vuri në dukje krijimin e bashkëpunimit  të MK me bashkitë vendore,  nismë e cila nis me Lezhën dhe zhvillohet në kuadër të programit “Edukimi përmes Kulturës”.

 “Prej shumë vitesh bibliotekat publike kanë qenë jashtë vëmendjes së bashkive. Arsyeja pse e nisëm këtë projekt nga Lezha,  është se  në këtë bibliotekë  gjetëm dashuri për librin. Prandaj edhe e mirëpritëm projektin e Lezhës “Biblioteka lëvizëse”. Në të gjitha programet e MK prioritet mbetet lexuesi. Nëse nuk kemi lexues, nuk kemi autor, nuk kemi, përkthyes, nuk kemi botues”- u shpreh Ministrja Kumbaro në fjalën e saj.

Projekti i MK-së  është vijueshmëri e nismave të ndërmarra në këto katër vite për pasurimin e bibliotekave vendore dhe shkollore. Vitin e kaluar, në kuadër të Fushatës së leximit “Takohemi për një libër”, u hartua edhe projekti për mbështetje të bibliotekave vendore të qytetit të Tiranës.

“Ka një qasje të re të institucioneve të kulturës , andaj jam shumë e gëzuar që nisim sot një marrëdhënie bashkëpunimi me MK”- u shpreh drejtoresha e Bibliotekës Publike "Gjergj Fishta"  Lezhë, Suela Bala.

Titujt e librave që dhurohen sot nga fondi i MK  janë përzgjedhur nga një kolegjium ekspertësh të jashtëm në përgjigje të nevojave të lexuesit.  Projekti  do të vazhdojë edhe në bibliotekat e Vlorës, Shkodrës, Fierit, Korçës dhe Elbasanit.

“Edukimi përmes leximit mbetet  një nga prioritetet e kësaj qeveri dhe MK.  Libri ushqen mendjen. Të ushqesh mendjen është tolerancë, emancipim, zhvillim.  Të dhurojmë  libra dhe të vazhdojmë traditën e kësaj zone që është e njohur për figurat e shquara në krijimtari, ku mes të cilëve do të doja të përmendja poetin  tim të dashur dhe mbi të gjitha Njeriun me mendje të bukur, Ndoc Gjetja”.

Zhvillimi i fushatës së leximit në mbarë vendin në tetor të vitit 2016, evidentoi gjithashtu Bibliotekat vendore më aktive në vend, me një shërbim profesional dhe të përkushtuar, si Biblioteka qendrore e qytetit të Lezhës, fituese në rang kombëtar për projektin “Biblioteka lëvizëse”, Biblioteka Publike e Vlorës "Shefqet Musaraj", Biblioteka Publike "Marin Barleti", Shkodër, Biblioteka Publike "Thimi Mitko", Korçë, Biblioteka Publike "Qemal Baholli", Elbasan. Këto biblioteka, si pjesë e kalendarit të gjërë të aktiviteteve, jo vetëm dëshmuan gatishmëri të stafeve përkatëse për punën me librin dhe për përthithjen e lexuesve, sidomos lexuesve të rinj, por gjatë monitorimit të aktiviteteve përkatëse u konstatuan edhe kushte të mira shërbimi dhe hapësire fizike për librat.

 "Shkrimtari im i parapëlqyer je ti Njeri, me shpirt të bukur njerëzor, që do te jetosh në të nesërmen e të ardhmes"- u shpreh Xhoana Gjokaj, nxënësja fituese e esesë më të mirë.

Në këtë takim merrnin pjesë edhe nënkryetarja e Bashkisë së Lezhës, znj. Alfrida Dedgjonaj, Drejtori i Drejtorisë  Arsimore Rajonale, Lezhë, Bardhok Pulaj, botues, krijues dhe nxënës që ndoqën aktivitetin në kuadër të programit “Orë letrare në Bibliotekë ”.